![Karo na biyu AC Milan ta yi rashin nasara a Serie A ta bana](https://blogger.googleusercontent.com/img/b/R29vZ2xl/AVvXsEiTpFAlMXMWzCXpZ_6yiBwhec5hNU-7WMLYft7CHb_i4Th-xtVADtem-UWgWtmY8SVxE9ht_f4semv4uGT5JhwOtpov7oAJCe3Fjvalfy0BBjm6rGBu1aejxmheV3y3W2YlGFwkhc20oVAq/w700/_116650746__116644713_gettyimages-1297989215.jpg)
AC Milan ta yi rashin nasara a gasar Serie A da ta buga a gida da Atalanta ranar Asabar.
Atalanta ta yi nasara da ci 3-0 a fafatawar da suka yi a San Siro, kuma an rage tazarar maki biyu tsakanin Milan ta daya da Inter ta biyu a teburi.
Cristian Romero ne ya fara cin kwallo, sannan Josip Ilicic ya kara na biyu a bugun fenariti, sai Duvan Zapata da ya kara na uku.
A gefe guda kuma Inter Milan ta barar da damar hadi maki iri daya da Milan, bayan da ta tashi ba ci a karawar da ta yi a gidan Udinese.
Wannan ne wasa na biyu a kakar bana da aka doke Milan a Serie A, bayan 3-1 da ta yi rashin nasara a hannun Juventus ranar 6 ga watan Janairu.
Milan wadda ta yi wasa 19 a gasar Serie A ta ci wasa 13 da canjaras hudu da rashin nasara a fafatawa biyu.
Kungiyar ta ci kwallo 39 an kuma zura mata 22 a raga, mai maki 43.
Atalanta wadda ta doke Milan ranar Asabar ta yi sama zuwa mataki na hudu a teburin Serie A da maki 36.
Wasa biyar da Milan za ta buga nan gaba:
Ranar Talata 26 ga watan Janairu Coppa Italiya
Inter da Milan
Ranar Asabar 30 ga watan Janairu Serie A
Bologna da Milan
Ranar Juma'a 5 ga watan Fabrairu Serie A
Milan da Crotone
Ranar 13 ga watan Fabrairu Serie A
Spezia da Milan
Alhamis 18 ga watan Fabrairu Europa League
Red Star Belgrade da Milan
0 Comments: